ميلاد جديد

على بركة الله.....أبدأ التدوين....بسم الله

كما ذكرت فى التدوينه السابقة ان فى موضوعات كتيرة بدور فى دماغى

أزاى هختار موضوع منهم .........اسبوعين من الحيرة لاختيار الموضوع المناسب

مش عارف أكتب عن ايه بالضبط...أزاى هقدر أجذب الاخوة المدونين لقراءة أولى تدويناتى

انا مش من الناس بتوع الانطباع الاول يدوم ....عشان كده قررت أكتب عن شخص وثيق الصلة بيا

مين ياترى.....هكتب عن محمد على...عبد الله الفقير يعنى هو انت مهم قوى عشان تكتب عن نفسك

ياعم مش مهم ولا حاجة انا شخص بسيط..بس هكلمك عن اخر خمس سنين من حياتى

ياه يعنى انت اكيد هتخلينى امل ..من القراية...ربنا يستر بس انا حاسس ان صدرك هيرحب بالقراية ان شاء الله

ولو مليت استحملنى يااخى انا لسه مدون جديد....ماشى ارغى ياعم الامور

أنهاردة ايه؟ انت هتهزر السبت ...ياعم طول بالك انهاردة ياسيدى هيكون عندى 22 سنه بالتمام والكمال والكمال طبعا لله وحده

انا بقولك كده ليه عشان هحكيلك على اخر خمس سنين ماشى...طب وشمعنا اخر خمس سنين ؟عشان هما السنين اللى عرفت فيهم ربى ونفسى صح هبدألك من يوم نتيجة تانية ثانوى..أكيد طبعا جبت 95/الميه

ياريت النتيجة كانت كالاتى....المجموع57فى الميه+ملحق رياضه ياليلتك البيضه

وعايز تبدأمن اليوم ده اه عشان لولا اليوم ده مكنتش ممكن اكون مدون أنهارده

اليوم ده خالانى أفكر كتير فى اللى حصل كنت فاكر عشان بصلى وبدعى اجيب مجموع انى هنجح بتفوق

هو انت مكنتش بتذاكر لا كنت بسطعبت ..اللى خلانى اعيد النظر فىحياتى كمان رد فعل العيلة الكل التف حولى وكمان بيواسونى على اللى حصل مع انى مكنتش بسمع لنصائحهم وجددوا الثقة فيا وعلى راسهم ابويا ربنا يديله الصحة

المهم دخلت امتحان الملحق ونجحت الحمد لله...بعد كده قعدت مع نفسى قاعدة طويلة حبتين ...ايه اللى حصل؟

قولتلها انتى عاجبك اللى حصل ..قالتلى لا قالتله طب انتى هتستمرى على كده قالتلى برضه لا

طب انت هتعملى ايه..اول حاجة لازم تصحح علاقتك بربنا مش معنى انك بتصلى انك هتنجح..تمتم

لازم جنب العباده يكون فى عمل ...تمتم وكمان لازم يكون هدفى مرتبط بالله وبالدين ولازم اكون شخص نافع لبلده ولدينه

وكمان لازم تذاكر وتخلص فى المذاكرة وتركزفى دروسك وتبر والديك ويكون هدفك مرتبط بكل ده

من هنا بدأت اكون شخص جديد مقبل على الحياة ...حاول تنجز لسه سن تالت وسنين الجامعة .....حاضر...

المهم ياسيدنا دخلت سنة تالته وكلى امل فى الله انى هجيب مجموع كويس نظمت وقتى وظبط حالى وركزت فى دروسى

وده بشهاده الجميع وكمان حسنت علاقتى بجميع افراد الاسرة والكل كان بيساندنى بقوة جه يوم النتيجة كنت متوقع انى هجيب مجموع معين المهم كان يوم درامى على ا لاخر مش هحكيهولك عشان انا حاسس انك زهقت وعشان مش عايزك تعيط

النتيجة ياسيدى كالاتى..المجموع83فى المية+ملحق انجليزى...تانى انت شكلك اتعودت على كده لا ياسيدى انت عارف

انا مزعلتش من النتيجة عارف ليه...عشان قولت ان ده اختبار من ربنا وان شاء الله هعديه

وايه اللى حصل كلهم كانوا فرحانين والزغاريد ملت البيت...انت اكيد بتهظر لا والله هو ده اللى حصل وتراشقت الهدايا عليا من الجميع

المهم دخلت الامتحان ونجحت الحمد لله وكان المجموع 70فى الميه قدمت فى التنسيق وكنت عايز اخش المعهد الفنى للفنادق المهم دخلت خدمة اجتماعية انتساب الفيوم .....كانت صدمة كبيرة قوى وكنت مخنوق على الاخر بس قولت لنفسى لازم تنجح ومش بس نجاح ولازم تتفوق...اه .اه دخلت الكليه وجددت النيه على الاخلاص والمذاكرة بجد المهم بعد مادخلت ندمت قوى انى زعلت الاول عشان انا لقيت نفسى فى الخدمة الاجتماعية عاجبنى الحال قوى بس كنت مضغوط علا الاخر لازم انجح واحول حلوان وكمان كنت بعمل رجيم قاسى قوى اصل كان وزنى قو ل 130كيلو وكمان سفر للفيوم يعنى بهدلة من كله ...المهم التيجة ظهرت فى اخر السنة ونجحت الحمد لله وجبت تقدير حلو

وكمان كان ليا ترتيب على الدفعة....واخيرا الفرحة دخلت بتنا من اول مرة

روحت حلوان عشان احول قاللولى هتشيل 5مواد عشان تحول...ياليلة بيضه رجعت البيت وعملنا مجلس عيلة الكل نصحنى انى استمر فى الفيوم وابويا قالى مايهمكش المصاريف رفضت بشده وقولت هحول والتوفيق بتاع ربنا المهم حولت حلوان على فكرة الرجيم اللى كنت عامله خلص ووزنى بقى 85كيلو دلوقتى 80بس ...جددت النيه واتكلت على الله المهم كان الجو جميل قوى فى حلوان وكونت علاقات طيبة مع الدكاترة وبدات اتعرف بين طلبة الكلية ودكاترة كتير اتنبئتلى انى هبقى معيد

المهم نجحت الحمد لله والتقدير كان كويس وترتيبى على الدفعة كان 23 ده طبعا كان انجاز كبير انا كنت بمتحن كل يوم مفيش فواصل

متتخيلش الفرحة اللى غمرت البيت كنت فى نظرهم بطل ...طبعا انا ولا بطل ولا حاجة ده كله توفيق ربنا ودعاء الوالدين

دخلت تالتة ياسيدى بروح جديده خالص عاقد العزم من الاول انى اتعين معيد كانت اجمل سنين عمرى عمرى ماهنسا السنة ديه

كنت والحمد لله معروف قوى بين الطلبة الغالبية علاقتى بيهم طيبة ده كمان ايه الدكاترة كانت بتكلم عنى كويس وصحابى المخلصين كانوا بيقولولى بيقولوا عليا ايه المهم النتييييجة طلعت والحمد لله كنت الاول على الدفعة وامتياز فى التدريب الميدانى على فكرة انا كنت بدرب فى رسالة فيصل اكتشفت نفسى فيها اكتر وكانت سبب فى اللى حصلى عشان انا كنت الليدر بتاع المجموعة والقائم على شئونها هبقى احكيلم عن رسالة مرة تانية......المهم دخلت رابعة والاصرار والعزيمة بيزيدوا وكانت علاقتى بربنا كويس عن الاول وده بسبب ارتباطى قوى بخير الاصدقاء "يسر" كان معايا فى حاجات كتير هو اللى خلانى افكر فى التعيين وخلانى كمان احفظ القران الكريم ...انجز ياعم انا مليت قوى واتخنقت...خلاص قربت اخلص....كنت بذاكر احسن من الاول والفرق ان السنادى عن اى سنة تانيه انى كنت فاهم اللى بذاكره وكنت مستمتع قوى منا خلاص عشقت الخدمة الاجتماعية لدرجة انى صحابى دايما كانوا بيقولولى "ابقى خلى الخدمة الاجتماعية تنفعك"

المهم كانت المنافسة صعبة قوى بس فى الاخر جبت جيد جدا بس متعينتش ...طب هو انت قصرت...لا والله بس كان فى شوية ظروف اثرت عليا المهم ...مزعلتش كتير مع انى كنت معلق امل كبير عليه مش عشان تحقيق مجد شخصى بس كمان كنت عايز يكون ليا دور فى الارتقاء بمستوى المهنة واخدم الناس انا رسالة ورتنى حاجات عمرى ماشوفتها...المهم قولت لنفسى ممكن اخدم الناس والخدمة الاجتماعية من غير ماكون معيد المهم ايه صحح النية

المهم جهزت ورق الجيش ودوقت الامرين فى تجهيزه وكشفت وكده والحمد لله خدت تاجيل

ودلوقتى انا شغال فى شركة توزيع ادويه حاجة مؤقته لغاية ياما اظبط شوية حاجات عندى

انا خلا ص خلصت انا عارف انى كنت ممل قوى طول الحديث كل شوية ملاحق واحزان ونكد حاجة تفلق بس هقولكم حاجة اخيرة

انا كتبت التدوينة ديه عشان اى حد واجه موقف فشل ميكدرش نفسه ويقول الدنيا اسودت فى وشى ومفيش امل بجد ياجماعة كل اللى حصل ده مكانش سهل بالنسبة ليا ولا اللى حواليا انا كنت بشبه الايام ديه بالقصه الانجليزية"ايام عصيبة"

هيا مكانتش سهلة بس الاستعانة بالله والتوكل عليه واخلاص النية بيفرق كتير قوى وانا مثل حى على كده

انا والحمد لله اتغيرت0 36درجة من شخص ملهوش اهداف فى الحياة لشخص ايجابى وله هدف كبير بيحاول يحققه

انا والله مابشكرش فى نفسى"فلا تزكوا أنفسكم هو اعلم بمن أتقى"النجم "32"

بس هو ده اللى حصل ياجماعة ان كل واحد فينا يربط هدفه بربنا دى حاجة عظيمة قوى ان يكون هدفه رفعة الدين الاسلامى هيلاقى نفحات وبركات ربانية لا يتخيلها ومهما شاف من صعوبات وعقبات هيلاقى ربنا سبحانه وتعالى جنبه....وانا اهوه ببتدى بدايه لرحلة طويله يارب تبقى اساسها رضا الله وتقواه....انا خلصت خلاص....ارجو منكم متكونوش مليتم منى

على خير نلتقى....................والله ولى التوفيق